Həyatın təyini nədir?
Həyat varlıq, dirilik deməkdir. Bir doğum evində dünyaya insan gəlir. Ona ad verilir. İnsan bəslənilir, yeriməyə, danışmağa, işləməyə başlayır. Bu insanın cəmiyyətdə yeri, gördüyü işlər, münasibətdə olduğu insanlar, yaşadığı yer və s. olur.
Yaxşı, bəs məhsul nədir?
Hansısa ehtiyaca və ya istəyə cavab verən vahiddir. Məhsul beyində dünyaya gəlir (ideya olur). Ona ad verilir, məhsulun inkişafı üçün müxtəlif həllərin validasiyası aparılır. Sonda özünü doğruldan həll işə salınır.
Bu məhsulun bazarda tutduğu yer, gördüyü iş, qatdığı dəyər, əlaqədə olduğu digər sistemlər və s. olur.
Məhsul virtual və ya fiziki ola bilir.
İnsan özü fiziki olsa da, sosial şəbəkələr köməyi ilə həyatın “daha yaxşı” virtual versiyasını yarada bilər.
Məhsulun planlaşdırılmasından və dəstəklənməsindən məsul olan biri var. Bu məhsul meneceridir.
Yəni, həyatımız bir məhsuldursa, biz onun meneceriyik.
Bu mövzuları yaxşı bilənlər deyir ki, əgər məhsulun varsa, gərək onun vizyonu, vizyona uyğun strategiyası, strategiyaya uyğun yol xəritəsi, yol xəritəsinə uyğun görüləcək işlər olsun. Bu işləri düzgün prioritetləşdirib, doğru vaxtda işə salsan, məhsul tutduğu yol ilə davam edər və uğur qazanar. Əsas odur bu prosesi dayandırmayasan və daim rəylər alıb, onlara uyğun düzəlişlər aparasan. Yəni daim görüb-götürəsən, öyrənəsən. İnkişaf edəsən.
Məhsulunuz üçün qərar verməyə çətinlik çəkirsinizsə, normal haldır. Çünki həyatda da düzgün qərarlar vermək çətindir. Bu paralleli ona görə apardım ki, düşüncə tərzini izah edə bilim. “Məhsulumun nələri olmalıdır?”- sualını verdikdə, “Həyatımın nələri olmalıdır?”- sualını vermiş olursunuz. Bu da yaşamaq istədiyiniz həyatdan (yəni qurmaq istədiyiniz məhsuldan) asılıdır.
Həyatınıza ehtiyyatla yanaşdığınız kimi, məhsula da ehtiyyatla yanaşın.
Çünki kontekst önəmlidir.